Sobre Quincegotas

QUINCEGOTAS, IV Festival de Danza na rúa. A Coruña 21, 22 e 23 de setembro

A danza volve a escapar dos seus escenarios habituais e instálase nas rúas e nas prazas da Coruña para se converter nun elemento máis nos espazos de convivencia cotiá da cidade. O Festival Quincegotas leva a danza lonxe das butacas dos teatros e preto da veciñanza, que poderá gozar de tres días con algunhas das mellores compañías de danza de Galicia e de fóra da comunidade.

Quincegotas trasladará a danza a novos espazos da cidade realizando un percorrido que cambia en cada edición para que todos os barrios da Coruña sexan escenarios improvisados. A danza tamén chegará ao Concello de Oleiros e, como novidades, haberá un espazo destinado a conservatorios, escolas e universidades e que servirá para expor o labor de formación e a liña de traballo de cada centro. 12 compañías, estreas en Galicia, estreas absolutas, máis actuacións, workshops, proxeccións… Tras o éxito dos anos anteriores, chega a cuarta edición de Quincegotas, Festival de Danza na Rúa, con máis novidades e danza que nunca.